ഗ്രന്ഥപ്പുരയിലെ വിവിധ പദ്ധതികളിലൂടെ ഇതിനകം ഡിജിറ്റൈസ് ചെയ്ത രേഖകളിൽ ആഴ്ചപതിപ്പുകൾ, മാസികകൾ, ദിനപത്രങ്ങൾ തുടങ്ങിയവ ഒരുമിച്ചു കാണാനായും അവയുടെ ആക്സസബിലിറ്റിയും വിസിബിലിറ്റിയും കൂട്ടുന്നതിന്റെയും ഭാഗമായും ആർക്കൈവ്.ഓർഗിൽ Kerala Periodicals എന്ന പേരിൽ ഒരു കളക്ഷൻ നിർമ്മിച്ചിരിക്കുന്നു. ഈ കളക്ഷൻ ഇവിടെ കാണാം https://archive.org/details/kerala-periodicals. ഇത് Kerala Archives എന്ന മാസ്റ്റർ കളക്ഷന്റെ ഉപവിഭാഗമാണ്.

ഇതു വരെ ഡിജിറ്റസ് ചെയ്ത എല്ലാ ആനുകാലികങ്ങളും ഈ കളക്ഷന്റെ (https://archive.org/details/kerala-periodicals) കീഴിൽ കൊണ്ടുവരാനാണ് ശ്രമിക്കുന്നത്. നിലവിൽ നൂറിലധികം രേഖകൾ ഈ കളക്ഷന്റെ കീഴിൽ ആക്കിയിട്ടൂണ്ട്. Kerala Archives ന്റെ കീഴിൽ കിടക്കുന്ന ആനുകാലികളിൽ ഈ കളക്ഷന്റെ കീഴിൽ വരാത്തവ തുടർന്നുള്ള ദിവസങ്ങളിൽ ഇതിന്റെ കീീഴിൽ കൊണ്ടുവരുന്നതാണ്.

ഈ കളക്ഷനിലെ ഏറ്റവും പഴയ ആനുകാലികം മലയാളത്തിലെ ആദ്യത്തെ ആനുകാലികങ്ങളിൽ ഒന്നായ പശ്ചിമൊദയം ആണ്. ഡിജിറ്റൈസ് ചെയ്യപ്പെട്ട പത്തൊൻപതാം നൂറ്റാണ്ടിലെ മറ്റു പ്രമുഖ കേരള ആനുകാലികങ്ങൾ സി.എം.എസിന്റെ വിദ്യാസംഗ്രഹവും, ബാസൽ മിഷന്റെ കേരളോപകാരിയും ആണ്. ഇപ്പോഴും പ്രസിദ്ധീകരിച്ചു കൊണ്ടിരിക്കുന്ന ആനുകാലികളിൽ ഭാഷാപോഷിണിയുടെ 1920കളിൽ ഇറങ്ങിയ കുറച്ചു ലക്കങ്ങളുടെ ഡിജിറ്റൽ കോപ്പി ലഭ്യമാണ്. ഈ കളക്ഷനിൽ ഉൾപ്പെടുന്ന മാപ്പിള റവ്യൂ, ഗുരുനാഥൻ മാസിക, വൈദ്യസാരഥി മാസിക, അരുണ മാസിക, സഹോദരി മാസിക തുടങ്ങിയവ ഒക്കെ പ്രസിദ്ധീകരണം നിലച്ചു പോയവ ആണ്.

https://archive.org/details/kerala-periodicals എന്ന കളക്ഷൻ പേജിൽ എത്തിക്കഴിഞ്ഞാൽ Topics & Subjects എന്ന കാറ്റഗറിയും Year എന്ന കാറ്റഗറിയും ഫിൽറ്റർ ചെയ്ത് എടുത്താൽ നിങ്ങൾക്കു താല്പര്യമുള്ള ആനുകാലികങ്ങളുടെ ലക്കങ്ങളിലേക്ക് വളരെയെളുപ്പം എത്തിച്ചേരാവുന്നതാണ്. ഗവേഷകരും മറ്റു താല്പര്യമുള്ളവരും ഈ രേഖകളൊക്കെ ഉപയോഗപ്പെടുത്തി കൂടുതൽ കൃതികൾ സൃഷീക്കുമല്ലോ.

പൊതുസഞ്ചയത്തിൽ വരുന്ന 1960നു മുൻപുള്ള കേരളവുമായി ബന്ധപ്പെട്ട ഇത്തരം ആനുകാലികങ്ങൾ ഡിജിറ്റൈസ് ചെയ്ത് സംരക്ഷിക്കേണ്ടത് ഇത്തരം രേഖകളിൽ താല്പര്യമുള്ള എല്ലാവരുടേയും ചുമതല ആണെന്ന് ശ്രദ്ധിക്കുമല്ലോ. അതിൽ എന്നെ സഹായിക്കാൻ പറ്റുന്നവർ എനിക്ക് മെയിലയക്കുക. ഒരു പ്രധാനകാര്യം ഓർക്കുക മനോരമ, മാതൃഭൂമി പോലൊയുള്ള വൻകിട പ്രസിദ്ധീകരണശാലകകളെക്കാൾ ചെറുകിട കൂട്ടായ്മകളിലൂടെ വന്ന് തങ്ങളുടേതായ സ്ഥാനം കേരളത്തിന്റെ ചരിത്രത്തിൽ രേഖപ്പെടുത്തി പ്രസിദ്ധീകരണം നിലച്ചു പോയ പഴയകാല ആനുകാലികങ്ങളുടെ കാര്യത്തിൽ ആണ് എന്റെ ശ്രദ്ധ. സഹായിക്കാൻ പറ്റുന്നവർ എനിക്ക് മെയിലയക്കുക. എന്റെ വിലാസം shijualexonline @ ജിമെയിൽ.കോം