About

I am Shiju Alex. I live in Bangalore, Karnataka, India.

My interests include Astrophysics, Trekking, Malayalam and Kerala related Public Domain books, Malayalam Wiki projects, and other Malayalam Computing related activities.

In this blog, I am trying to collect, digitize, and share Malayalam/Kerala related public domain documents with public. You can reach me at shijualexonline@gmail.com.

——————————————

എന്റെ പേരു്: ഷിജു അലക്സ്. സ്വദേശം പാലക്കാട്. ഇപ്പോൾ ബാംഗ്ലൂരിൽ ഒരു സ്വകാര്യ കമ്പനിയിൽ ജോലി.

കേരളവും മലയാളവുമായി ബന്ധപ്പെട്ട പൊതുസഞ്ചയ രേഖകളുടെ ഡിജിറ്റൈസേഷൻ, ജ്യോതിർഭൗതികം, ട്രെക്കിങ്, മലയാളം വിക്കി പദ്ധതികൾ, മലയാളം കമ്പ്യൂട്ടിങ്  തുടങ്ങി വിവിധ വിഷയങ്ങളിൽ എന്റെ താല്പര്യം ചിതറി കിടക്കുന്നു. ജ്യോതിശാസ്ത്രവുമായി ബന്ധപ്പെട്ട ഒരു മലയാളം ബ്ലോഗ് (http://jyothisasthram.blogspot.com/) 2009 വരെയെങ്കിലും സജീവമായി ഉണ്ടായിരുന്നു. മറ്റുവിഷയങ്ങളിലുള്ള ബ്ലോഗ് പോസ്റ്റുകൾ (പ്രധാനമായും മലയാളം വിക്കി സംരംഭങ്ങൾ സംബന്ധിച്ച്) (http://shijualex.blogspot.com/) എന്ന ബ്ലൊഗിലും കാണാം

കേരളവും മലയാളവുമായി ബന്ധപ്പെട്ട പൊതുസഞ്ചയ രേഖകളുടെ ഡിജിറ്റൈസേഷൻ” എന്ന പദ്ധതിയ്ക്കാണ്  2010 തൊട്ടെങ്കിലും കൂടുതൽ പ്രാമുഖ്യം കൊടുക്കുന്നത്. ഈ ബ്ലോഗിൽ (https://shijualex.in/) അതുമായി ബന്ധപ്പെട്ട വിവിധ സംഗതികൾ ശേഖരിച്ച് ക്രോഡീകരിച്ചിരിക്കുന്നു.

 

malayalam

താങ്കൾ ചെയ്യുന്ന പരിപാടികൾ എന്തൊക്കെയാണ്?

കേരളവും മലയാളവുമായി ബന്ധപ്പെട്ട എല്ലാ ഭാഷകളിലും ലിപികളിലും (പ്രധാനമായും മലയാളം, തമിഴ്, ഇംഗ്ലീഷ്, സുറിയാനി, സുറിയാനി-മലയാളം, അറബി മലയാളം, ലത്തീൻ, പൊർട്ടുഗീസ്, ജർമ്മൻ  ഭാഷകൾ) ഉള്ള പൊതുസഞ്ചയ (public domain) രേഖകൾ ( അച്ചടി പുസ്തകം, കൈയ്യെഴുത്ത് രേഖകൾ, താളിയോല, ചിത്രങ്ങൾ, ഓഡിയോ, വീഡിയോ,  തുടങ്ങി വിവിധ രൂപത്തിലുള്ള പൊതുസഞ്ചയരേഖകൾ)  വിവിധ തരത്തിൽ സമ്പാദിച്ച് ക്രോഡീകരിച്ച് ഡിജിറ്റൈസ് ചെയ്ത് പൊതുവായി എല്ലാവർക്കും സൗജ്യമായി ലഭ്യമാകുന്ന വിധത്തിൽ പങ്കുവെക്കുക എന്നതാണ് പ്രവർത്തനത്തിന്റെ കാതൽ. അതിനായി താഴെ പറയുന്ന കാര്യങ്ങൾ ആണ് പ്രധാനമായും ചെയ്യുന്നത്:

  • മുകളിൽ പറഞ്ഞ തരത്തിലുള്ള പൊതുസഞ്ചയരേഖകൾ ഇതിനകം ആരെങ്കിലും എവിടെയെങ്കിലും ഡിജിറ്റൈസ് ചെയ്ത് ലഭ്യമാക്കിയിട്ടുണ്ടെങ്കിൽ അത് ശേഖരിച്ച് എല്ലാവർക്കും ലഭ്യമാകുന്ന വിധത്തിൽ പങ്കു വെക്കുക.. ഇത്തരത്തിൽ ചെയ്തതിന്റെ ചില ഉദാഹരണങ്ങൾ ഗൂഗിൾ ബുക്സ് ഡിജിറ്റൈസ് ചെയ്ത ബെഞ്ചമിൻ ബെയിലിയുടെ നിഘണ്ടുക്കൾഗുണ്ടർട്ട് നിഘണ്ടുഹോർത്തൂസ് മലബാറിക്കസ്, നുറൂ കണക്കിനു മിഷനറി രേഖകൾ തുടങ്ങിയവ ആണ്.
  • ഒരു പൊതുസഞ്ചയ രേഖ ഇതിനകം ഡിജിറ്റൈസ് ചെയ്തിട്ടില്ലെങ്കിൽ,  എനിക്കു നേരിട്ടു അനുമതി ഉള്ള സ്ഥലങ്ങളിൽ, സ്വന്തമായി (അല്ലെങ്കിൽ സുഹൃത്തുക്കളുടെ സഹായത്തോടെ) ഡിജിറ്റൈസ് ചെയ്തു രേഖകൾ പൊതു ഇടത്തിൽ ലഭ്യമാക്കുക. ഇത്തരത്തിൽ ചെയ്തതിന്റെ ഉദാഹരണങ്ങൾ ഞാൻ തന്നെ ഡിജിറ്റൈസ് ചെയ്ത ശബ്ദതാരാവലിസംക്ഷേപവേദാർത്ഥംറമ്പാൻ ബൈബിൾ തുടങ്ങിയവ.
  • ഒരു പൊതുസഞ്ചയ രേഖ ഇതിനകം ഡിജിറ്റൈസ് ചെയ്തിട്ടില്ലെങ്കിൽ, ആ രേഖ ഇരിക്കുന്ന സ്ഥലം എനിക്കു നേരിട്ടു ഡിജിറ്റൈസ് ചെയ്യാൻ പറ്റുന്ന  ഇടമെല്ലെങ്കിൽ അത്തരം ഇടങ്ങളിൽ പ്രസ്തുത രേഖകൾ ഡിജിറ്റൈസ് ചെയ്യേണ്ടതിന്റെ പ്രാധാന്യം അതിന്റെ ആളുകളെ പറഞ്ഞു ബോദ്ധ്യപ്പെടുത്തി ആ രേഖകൾ അവരെ കൊണ്ടു തന്നെ ഡിജിറ്റൈസ് ചെയ്ത് പൊതു ഇടത്തിലേക്ക് കൊണ്ടു വരിക. ട്യൂബിങ്ങനിലെ ഗുണ്ടർട്ട് ശെഖരം ഡിജിറ്റൈസ് ചെയ്ത പദ്ധതി ഈ ഗണത്തിൽ പെടുത്താം.
  • പൊതുസഞ്ചയരേഖകൾ ഡിജിറ്റൈസ് ചെയ്യേണ്ടതിന്റെ പ്രാധാന്യം വിവിധ സ്ഥാപനങ്ങളേയും ആളുകളേയും ബോദ്ധ്യപ്പെടുത്തുക. (പൊതുസഞ്ചയ രേഖകൾ നല്ല ഗുണനിലവാരത്തിൽ ഡിജിറ്റൈസ് ചെയ്ത് എല്ലാവർക്കും ലഭ്യമാക്കതക്ക വിധത്തിൽ റിലീസ് ചെയ്യേണ്ടതിന്റെ പ്രാധാന്യം വിവിധ കേരളസർക്കാർ സ്ഥാപനങ്ങളെ ബോധ്യപ്പെടുത്താൻ ഞാൻ നിരവധി വർഷങ്ങളായി ശ്രമിക്കുന്നു എങ്കിലും ഈ വിഷയത്തിൽ ഞാൻ നിരന്തരമായി പരാജയപ്പെട്ടു കൊണ്ടിരിക്കുന്നു)
  • ഈ വിഷയത്തിൽ താല്പര്യമുള്ള ആളുകളെ കൂട്ടി യോജിപ്പിക്കുക.

തുടങ്ങിയ കാര്യങ്ങളാണ് പ്രധാനമായും ചെയ്യുന്നതു്. ഇതിനായി ഈ ബ്ലോഗ് ഉപയോഗിക്കുന്നു എങ്കിലും തക്കതായ സമയവും താലപര്യമുള്ള കുറച്ചധികം ആളുകളും വരുമ്പോൾ ഇതിനു ഇതിന്റേതായ ഒരു പൊതു ഇടം ഉണ്ടാവണം എന്നാണ് എന്റെ ആഗ്രഹം. അതു സംഭവിക്കുന്നതു വരെയുള്ള അല്പം നീളം കൂടിയ പാലമായി കരുതിയാൽ മതി എന്റെ ഈ ഒറ്റപ്പെട്ട ശ്രമം.

എന്ത് കൊണ്ടാണ് ഈ വിഷയത്തിൽ ശ്രദ്ധ കേന്ദ്രീകരിച്ചിരിക്കുന്നത്?

താഴെ പറയുന്ന 3 കാരണങ്ങൾ കൊണ്ടാണ് നിലവിൽ ഈ വിഷയത്തിൽ ശ്രദ്ധകേന്ദ്രീകരിച്ചിരിക്കുന്നതു്

  1. കേരളവും /മലയാളവുമായി ബന്ധപ്പെട്ട പൊതുസഞ്ചയ രേഖകൾ പരിശോധിക്കാനുള്ള അനുമതി മിക്ക ഗവെഷകർക്കും കിട്ടാക്കനിയാണ്. (ചന്ദ്രക്കലയുടെ പരിണാമവുമായി ബന്ധപ്പെട്ട ഗവേഷണത്തിന്റെ ഇടയ്ക്ക് ഞാൻ ഈ വിഷമം നേരിട്ടു അനുഭവിച്ചതുമാണ്) യഥാർത്ഥമായി ഗവേഷണത്തിൽ താല്പര്യമുള്ളവർക്ക് പോലും primary sources പരിശോധിക്കാനുള്ള അനുമതി വലിയ കടമ്പ ആണ്. അത് പരിശോധിക്കാനുള്ള അനുമതി കിട്ടാൻ ശിപാർശയും മറ്റും ആവശ്യമായി വരുന്നു.  (അറിവിനെ ഇത്തരത്തിൽ മൂടിവെക്കുന്നത് തന്നെ വലിയ പാതകാണ്) ഇത്തരം രേഖകൾക്കായി പലരും വിദേശസർവ്വകലാശാലകൾ കയറി ഇറങ്ങുന്നുണ്ട് എങ്കിലും ഫലം തുച്ഛമാണ്.  എന്നാൽ നമ്മുടെ നിയന്ത്രണത്തിലുള്ളതും കേരളത്തിൽ തന്നെയുള്ളതും ആയ രേഖകൾ ശേഖരിച്ച് ക്രോഡീകരിക്കാൻ ആരും ശ്രമിക്കുന്നും ഇല്ല. ഇത്തരം primary sources ശെഖരിച്ച് ക്രോഡീകരിക്കാൻ ആരും ശ്രമിക്കാത്തതു മൂലം കേരളവും /മലയാളവുമായി ബന്ധപ്പെട്ട ഗവേഷണമേഖല ആകെ ദിശയില്ലാത്ത അവസ്ഥയിൽ ആണ്. ഇത്തരം രേഖകൾ ഏതു സമയത്തും പരിശോധനയ്ക്ക് ലഭ്യമാണ് എന്ന അവസ്ഥ വന്നാൽ ഇതുമായി ബന്ധപ്പെട്ട ഗവേഷണങ്ങൾ പടർന്നു പന്തലിക്കും എന്നാണ് എന്റെ പ്രത്യാശ. അതിനായി ഞാൻ എന്നെ കൊണ്ട് പറ്റുന്ന വിധത്തിലുള്ള ഒരു പ്രവർത്തനത്തിൽ ഏർപ്പെട്ടിരിക്കുന്നു. ഇതാണ് പൊതുസഞ്ചയ രേഖകൾ ശേഖരിച്ച് ക്രോഡീകരിക്കാനുള്ള ഒരു പ്രധാന കാരണം.
  2. കേരളത്തെ /മലയാളത്തെ മൊത്തമായി കണ്ട് എല്ലാ വിധ പൊതുസഞ്ചയരേഖകളേയും ഒരേ പോലെ കണ്ടു ഡിജിറ്റൈസ് ചെയ്യുന്ന പരിപാടികൾ ഒന്നും തന്നെ ഇപ്പോൾ ഇല്ല. അതിനാൽ മിക്ക രണ്ടാം നിര, മൂന്നാം നിര രേഖകൾ (അല്ലെങ്കിൽ പലവിധ കാരണങ്ങൾ കൊണ്ട് അപ്രധാനമെന്ന് ചിലർ കരുതുന്ന രേഖകൾ) മിക്കതും തമസ്ക്കരിക്കപ്പെടുന്നു. അതു മൂലം അതൊക്കെ എന്നെന്നേക്കുമായി നഷ്ടപ്പെട്ടു പോകാൻ ഇടയാകുന്നു. ഇതിൽ നിന്നു വ്യത്യസ്തമായി കേരളവും /മലയാളവുമായി എല്ലാ വിധ രേഖകളും (അച്ചടി പുസ്തകങ്ങൾ, കൈയ്യെഴുത്തു രേഖകൾ, താളിയോലകൾ, നോട്ടീസുകൾ, വിവിധ ചെറു ചെറു രേഖകൾ,ഓഡിയോ, വീഡിയോ തുടങ്ങി എല്ലാം തന്നെ ഡിജിറ്റൈസ് ചെയ്യപ്പെടുകയും അത് പൊതുമണ്ഡലത്തിലേക്കു വരികയും വേണം.  ഇതാണ് വേറൊരു പ്രധാനകാരണം.
  3. വിവിധ സർക്കാർ സ്ഥാപനങ്ങൾ ഡിജിറ്റൈസെഷൻ പരിപാടികൾ നടത്തുന്നുണ്ട് എങ്കിലും അവർ ചെയ്യുന്നതൊന്നും പൊതുജനങ്ങൾക്ക് ലഭ്യമാക്കുന്നില്ല. അപൂർവ്വമായി ചില സർക്കാർ സ്ഥാപനങ്ങൾ ഡിജിറ്റൈസ് ചെയ്ത രേഖകൾ തുറന്നു കൊടുത്തിട്ടൂണ്ടെങ്കിലും അതു ജനങ്ങൾക്കു ഉപകാരപ്രദമായ വിധത്തിലല്ല. ഉദാഹരണത്തിനു, വെറുതെ ഫൊട്ടോ എടുത്ത് അപ്‌ലോഡ് ചെയ്യുന്നത് മൂലം ഉള്ള അപാരമായ ഫയൽ സൈസ്, പേജുകളുടെ ഫോട്ടോകളിൽ ഉള്ള ഗുണനിലവാര പ്രശ്നം, യാതൊരു മാനദണ്ഡങ്ങളും പാലിക്കാതെ വെറുതെ കടമ തീർക്കുന്ന വിധത്തിലുള്ള ഡിജിറ്റൈസേഷൻ, ടെക്നിക്കൽ അറിവില്ലാത്ത ആളുകൾക്ക് ഉപയോഗിക്കാൻ യുക്തമല്ലാത്ത വിവിധത്തിൽ Digital Library of India പോലുള്ള സ്ഥാപനങ്ങൾ പങ്കു വെക്കുന്ന വിചിത്രമായ ഫയൽ ഫോർമാറ്റുകൾ , തുടങ്ങി ജനങ്ങളെ പരമാവധി കഷ്ടപ്പെടുത്തുന്ന വിധത്തിലുള്ള പരിഹാരങ്ങൾ ആണ് നിലവിൽ നമ്മുടെ സർക്കാർ സ്ഥാപനങ്ങളുടേത്. ഈ സംവിധാനങ്ങൾ ഒക്കെ നിർമ്മിക്കുന്നത് പൊതുപണം ഉപയോഗിച്ചാണ് എന്നത് ഓർക്കുമ്പോൾ ഇത് ഖേദകരവുമാണ്. ഇതിൽ നിന്നു വ്യത്യസ്തമായി പൊതുസഞ്ചയരേഖകളുടെ ഉപയോഗക്ഷമത വർദ്ധിപ്പിക്കാൻ എന്നെ കൊണ്ട് ആവുന്ന വിധത്തിൽ ചെറുതായി സഹായിക്കുക എന്നതാണ് വേറൊരു പ്രധാന കാരണം.

ഇതിനുള്ള സമയം, പണം ഒക്കെ എങ്ങനെ താങ്കൾ കണ്ടെത്തുന്നു?

ഈ പരിപാടിക്കായി ധാരാളം സമയവും പ്രയത്നവും ആവശ്യമാണ്.

സമയം: ജോലിയിൽ നിന്നും കുടുംബത്തോടൊപ്പമുള്ള സമയത്തിൽ നിന്നും മോഷ്ടിച്ചെടുക്കുന്ന സമയമാണ് ഇപ്പോൾ ഇതിനു പ്രധാനമായും ഉപയോഗിക്കുന്നത്.

പണം: ഈ പരിപാടിക്കായി ധാരാളം യാത്രകൾ വേണ്ടി വരുന്നുണ്ട്.  അതിനായി ഭാരിച്ച പണച്ചിലവ് വരുന്നുണ്ട്. ഒപ്പം വിവിധ ഡിജിറ്റൈസേഷൻ സാമഗ്രികൾ (ഉദാ: കോപ്പി സ്റ്റാൻഡ്, ഡിജിറ്റൽ ക്യാമറ, ലാപ്പ് ടോപ്പ്, ലൈറ്റിങ് സാമഗ്രികൾ തുടങ്ങിയവ) വേണ്ടതുണ്ട്.   ഇങ്ങനെ മിക്ക സംഗതികൾക്കും ഭാരിച്ച ചിലവുണ്ട്. ഡിജിറ്റൈസേഷനു വേണ്ട ചില സാധന സാമഗ്രികൾ വാങ്ങാൻ എന്റെ സുഹൃത്തുക്കളായ ജ്യോതിസ്സ്, ജിസ്സോ ജോസ്, ബെഞ്ചമിൻ വർഗ്ഗീസ്, സുനീഷ് ജൊർജ്ജ് എന്നിവർ സഹായിച്ചിട്ടൂണ്ട്. അവരൊട് കടപ്പാടുണ്ട്. അതൊഴിച്ചാൽ ഇതുവരെ എല്ലാം  എന്റെ സ്വന്തം ചിലവിലാണ് നടത്തിയത്. ശമ്പള വരുമാനവും അല്പസ്വല്പ നിക്ഷേപ വരുമാനവും ഒക്കെയാണ് ഇതിനു ഉപയോഗിക്കുന്നത്.

വേറെ ആരെങ്കിലും ഏതെങ്കിലും വിധത്തിൽ താങ്കളെ സഹായിക്കാറുണ്ടോ?

ഇതുമായി ബന്ധപ്പെട്ട വിവിധ വിഷയങ്ങളൾ ഞാൻ ചർച്ച ചെയ്യുന്നത് എന്റെ പ്രിയ സുഹൃത്ത് സുനിൽ വി.എസ്. നോടാണ്.  ഞങ്ങൾ രണ്ട് പേരും ചേർന്ന് “മലയാളപൊതുസഞ്ചയരേഖകളുടെ ഡിജിറ്റൈസേഷൻ – നിലവിലെ സ്ഥിതിയും സാദ്ധ്യതകളും” എന്ന ഒരു ലേഖനം എഴുതിയിട്ടൂം ഉണ്ട്. മാത്രമല്ല ചന്ദ്രക്കല:ഉത്ഭവവും പ്രയോഗവും എന്ന ഗവേഷണപ്രബന്ധത്തിലും സുനിൽ പങ്കാളിയായിരുന്നു. ഇതുകൊണ്ടൊക്കെ ഞാൻ ഏറ്റവും അധികം കടപ്പെട്ടിരിക്കുന്നത് സുനിലിനോടാണ്. സൈറ്റിൽ കാണുന്ന വിവിധ പട്ടികകളും മറ്റും ക്രമപ്പെടുത്താനും മറ്റും സഹായിക്കുന്നത് തിരൂർ മലയാളം കൂട്ടായ്മ ആണ്.

ചില പുസ്തകങ്ങൾ ഡിജിറ്റൈസ് ചെയ്യാൻ ബൈജു രാമകൃഷ്ണൻസുഗീഷ്കണ്ണൻ ഷണ്മുഖംഅഖിൽവിശ്വപ്രഭബെഞ്ചമിൻ, ടോണി ആന്റണി എന്നിവർ സഹായിച്ചിട്ടുണ്ട്.

സൈറ്റ് ഹോസ്റ്റ് ചെയ്യാനുള്ള സെർവ്വർ സ്പേസ് രാജേഷ് ഒടയഞ്ചാൽ, ഷെഫി കബീർ, ജ്യോതിസ്സ് എന്നിവർ ആണ് വിവിധ കാലഘട്ടങ്ങൾ തന്ന് സഹായിച്ചത്.

സൈറ്റുമായി ബന്ധപ്പെട്ട സാങ്കേതിക സഹായങ്ങൾ ചെയ്തു തരുന്നത് രാജേഷ് ഒടയഞ്ചാൽജുനൈദ്, വൈശാഖ് കല്ലൂർ എന്നിവർ ആണ്.  എല്ലാവരോടും നിസ്സീമമായ നന്ദിയും സ്നേഹവും കടപ്പാടും .

മലയാളത്തെ/കേരളത്തെ സംബന്ധിച്ച ഈ പദ്ധതി  താങ്കൾ എന്തു കൊണ്ട് താങ്കളുടെ https://shijualex.in/ എന്ന സ്വകാര്യ ബ്ലോഗിൽ ചെയ്യുന്നു?

അത് വളരെ യാദൃശ്ചികായി സംഭവിച്ചു പോയതാണ്. തുടക്കകാലത്ത്  ഒരു ഹോബി പോലെ ഇടയ്ക്ക് കണ്ണിൽ പെടുന്ന പുസ്തകങ്ങളെ പറ്റി എന്റെ അഭിപ്രായവും ചേർത്ത് പോസ്റ്റ് ചെയ്യാനായി തുടങ്ങിയതാണ് ഈ ബ്ലോഗ്. ആ പരിപാടി എന്റെ സ്വകാര്യമായതിനാൽ  സ്വാഭാവികമായി അതിനായി എന്റെ ബ്ലോഗ് തന്നെ തിരഞ്ഞെടുത്തു. പക്ഷെ കാലാന്തരത്തിൽ ഈ പദ്ധതിയും ബ്ലോഗും ഒക്കെ ഞാൻ സ്വപ്നം പോലും കാണാത്ത  വിധത്തിൽ ആയിപോയി. ഇപ്പോൾ എന്റെ കൈയിൽ നിന്ന് വിട്ടു പോയി. ഈ ബ്ലോഗ് നിർത്താൻ പോലും പറ്റാത്ത സ്ഥിതി ആണ് ഇപ്പോൾ ഉള്ളത്,

സമയവും തക്കതായ താൽപര്യവുമുള്ള കുറച്ചധികം സന്നദ്ധപ്രവർത്തകർ വരുമ്പോൾ മാത്രം ഇതിനു ഇതിന്റേതായ മറ്റൊരു പൊതു ഇടം ഉണ്ടാവണം എന്നാണ് എന്റെ ആഗ്രഹം. അതു സംഭവിക്കുന്നതു വരെയുള്ള അല്പം നീളം കൂടിയ പാലമായി ഇപ്പൊഴത്തെ എന്റെ  ഈ ഒറ്റപ്പെട്ട ശ്രമത്തെ കരുതാം.

താങ്കൾ ഒരു നന്മ മരം ആണോ?

ഒരിക്കലും അല്ല. എന്റെ തന്നെ ഗവേഷണ ആവശ്യങ്ങൾക്കും ഈ പരിപാടി ചെയ്യുന്നതിലൂടെ ലഭിക്കുന്ന ആത്മസംതൃപ്തിക്കും വേണ്ടി ആണ് പരിപാടി ചെയ്യുന്നത്. അത്യാവശ്യം പ്രശസ്തിയും ഇതു മൂലം കിട്ടിയിട്ടൂണ്ട്. നിലവിൽ കേരളത്തിലെ ഏതൊരു സർക്കാർ/സ്വകാര്യ സ്ഥാപനങ്ങൾ തരുന്നതിനേക്കാൾ പുരാതനവും പ്രാധാന്യവും ഉള്ള രേഖകൾ ഞാൻ വഴിയാണ് ഡിജിറ്റൈസ് ചെയ്ത് പുറത്ത് വന്നത് എന്നതിൽ എനിക്കു അഭിമാനവും ഉണ്ട്.

നിലവിൽ ഈ വിഷയത്തിൽ താല്പര്യം ഉണ്ട് എങ്കിലും ജീവിതത്തിൽ താല്പര്യങ്ങൾ മാറുന്നതിണ് അനുസരിച്ച് ഒരു പക്ഷെ പിൽക്കാലത്ത് ഇത് ഞാൻ നിർത്തിയേക്കാം. പക്ഷെ ഡിജിറ്റൈസ് ചെയ്ത രേഖകൾ ഇതിനകം പൊതുവിടങ്ങളിൽ ലഭ്യമാണ് എന്നത് കൊണ്ട് ഇതുവരെ ഡിജിറ്റൈസ് ചെയ്ത് പുറത്ത് വിട്ട രേഖകൾ അതുമൂലം അവിടവിടങ്ങളിൽ തന്നെ ഉണ്ടാകും.

ഏത് തരം രേഖകളാണ് താങ്കൾ ഡിജിറ്റൈസ് ചെയ്യുന്നത്

കാലപ്പഴക്കം മൂലം കോപ്പിറൈറ്റ് കാലാവധി തീർന്നതിനാൽ സ്വാഭാവികമായി പൊതുസഞ്ചയത്തിൽ (public-domain) ഉള്ള രേഖകൾ, സർക്കാർ രേഖകൾ ആയതിനാൽ പൊതുസഞ്ചയത്തിലേക്ക് വരുന്ന രേഖകൾ, കോപ്പി റൈറ്റ് ഹോൾഡറുമാർ ഫ്രീ ലൈസൻസിൽ പ്രസിദ്ധീകരിച്ച രേഖകൾ ഇങ്ങനെ മൂന്നു തരം രേഖകൾ  മാത്രമേ ഞാൻ ഡിജിറ്റൈസ് ചെയ്യുന്നുള്ളൂ. ഇന്ത്യൻ കോപ്പി റൈറ്റ് നിയമം അനുസരിച്ച് രചയിതാവ് മരിച്ച് 60 വർഷം കഴിഞ്ഞാൽ ആ രചയിതാവിന്റെ രചനങ്ങൾ എല്ലാം പൊതുസഞ്ചയത്തിൽ ആവും. അത്തരം കൃതികൾക്ക് കുറഞ്ഞത് 60 വർഷം പഴക്കമുണ്ടെങ്കിൽ അത് പൊതുസഞ്ചയത്തിലാണ്. അതിനാൽ തന്നെ ഈ ബ്ലോഗിലൂടെ ലഭ്യമാകുന്ന ഡിജിറ്റൽ സ്കാനുകൾ മിക്കതും ഏറ്റവും കുറഞ്ഞത് 60 വർഷം പഴക്കമുള്ളത് ആയിരിക്കും. കോപ്പിറൈറ്റ് ഉള്ള പുസ്തകങ്ങൾ ഡിജിറ്റൈസ് ചെയ്യുന്നത് എന്റെ താല്പര്യത്തിൽ ഉള്ള വിഷയമല്ല.അതേ പോലെ സ്വകാര്യശേഖരങ്ങൾ ഡിജിറ്റൈസ് ചെയ്ത് കൊടുക്കുന്നതും എന്റെ താല്പര്യത്തിൽ വരുന്ന സംഗതി അല്ല. ഞാൻ ഡിജിറ്റൈസ് ചെയ്യുന്നതൊക്കെ പബ്ലിക്ക് ആകും. പൊതുസഞ്ചയ രേഖകൾ രഹസ്യമായി സൂക്ഷിക്കുന്ന പരിപാടി അവസാനിപ്പിക്കുക എന്നത് ഈ പദ്ധതിയുടെ ഒരു പ്രധാന ലക്ഷ്യവുമാണ്.

ഡിജിറ്റൈസ് ചെയ്യുന്ന രേഖകളെ കുറിച്ചുള്ള അറിയിപ്പ് എവിടെയൊക്കെ ലഭ്യമാണ്?

താഴെ പറയുന്ന രണ്ട് ഇടങ്ങളിൽ ഓരോ രേഖയും ഡിജിറ്റൈസ് ചെയ്ത് പുറത്തു വിടുന്നതിനെ പറ്റിയുള്ള വിവരം ലഭിക്കും.

ഞങ്ങൾക്ക് താങ്കളെ സഹായിക്കാൻ പറ്റുമോ?

ഏതെങ്കിലും വിധത്തിൽ പിന്തുണയ്ക്കാൻ ആഗ്രഹം ഉണ്ടെങ്കിൽ എനിക്ക് മെയിലയക്കുക. എന്റെ ഇ-മെയിൽ വിലാസം: shijualexonline@gmail.com.

Google+ Comments

7 comments on “About

  • Dr Sumana Koundinya says:

    hi shiju, Namasthe…

    I read ur wallposts @practical samskrit and was quite impressed.
    I work for an NGO striving for the cause of reviving Samskrit as a spoken language, based in bangalore. We have taken up improving Sanskrit contents at wikipedia/source quotes etc. could you please share your thoughts/progress on the project since i see in your posts that you were active on this much earlierto us. guess we have some common grounds to discuss on. awaiting your reply…
    DhanyavadaaH
    Sumana

    Reply
  • Venu VR (Venu Koorappalli) says:

    ആദി ദ്രാവിഡം പറയും അൻപേ ശിവം അറിവേ ശിവം എന്ന് …… അറിവിനെ ഉപാസിക്കൽ ഈശ്വരനെ ഉപാസിക്കൽ തന്നെയാണ് സോദരാ ….. നന്ദി ഒരുമിച്ച് നടക്കാം മുന്നോട്ട് …… ആനന്ദോഹം

    Reply

Leave a Reply